Kaise Dale Subah Jaldi Uthne Ki Aadat Tips aur Tarike

Kaise Dale Subah Jaldi Uthne Ki Aadat Tips aur Tarike

Ayurved mein, granthon mein aur dharmo mein yeh  baat pathar ki lakir par likhi gai hai ki savere, suraj ugne se pehle hi aap uthke pooja kare, dhyan kare, yog kare ya phir kaamshuru kar de. Savere jaldi uthne mein kai laabh hai aur har ek aadmi ki koshish yehi honi chahiye ki voh suraj ke kirano se pehle hi neend mein se bahar aake raj ka program shuru kar de. Itihas mein dekhiye. Bahut saare successful logo ki aadat hai ki voh 5 baje hi uth jaate hai. Aaj ke jamane mein savere jaldi uthna shayad mushkil hai magar asambhav nahin hai. Jo job karte hai voh late se ghar aate hai aur phir relax hote hai to raat ke 12 to yoon hi baj jaate hai. Students ka life bhi aasaan nahin hai. Homework aur assignments complete karne ke liye raat ko der tak jagna padta hai. To phir kaise daale aadat savere jaldi uthne ki? Padhte rahiye aur aajaamaye yeh tarike to phir aap bhi jaldi uthne ke aadi ho jaayenge. 

Jaldi uthne ka matlab yeh to nahi hai ki aap late se so jaaye aur alarm 5 baje ka rakhe. Is se aap ko neend kam milega aur din bhar aap ka efficiency down ho jaayega. Kam se kam 7 ghante ki neend jaroori hai. Jaldi uthne ke liye jaldi so jaana chahiye. Theory mein 10 PM ko so jaana chahiye aur 5 ya 6 baje uthna chahiye. Practice mein yeh aasaan nahin hai. Agar aap ko aadat si ho gayi hai ki aap raat ke 12 ya 1 baje so jate hai to 10 baje sone jaayenge to neend hi nahin aayegi. Is ka karan hai ki har ek insaan ka sleep rhythm set ho jaata hai aur use badalne mein samay lagta hai. Jinhone videsh yatra ki hai voh jaante hai ki jet lag kya hota hai. Ek aur mushkili yeh hai ki har ek insan ka genetic coding hota hai. Kai log genetically aise programmed hote hai ki voh jaldi so jaate hai aur jaldi uth jaate hai. Kai logo ka efficiency raat ko hi badhti hai aur unhe raat ke 3 baje tak jagne mein koi taklif nahi hoti hai. To phir kya kare savere jaldi uthne ke liye aur neend bhi poora kar le?

Alarm set kare

Agar aap 8 baje uthe hai to 7 baje ka alarm rakhe. Svabhavik hai ki agar aap doosre din jaldi uthenge to neend bhi jaldi aayegi. Jaise jaise samay pasar hota hai to alarm aur bhi jaldi ka rakhiye. To dheere dheere aap 5 baje ko uthne ka lakshya hasil kar sakenge. Aap ka sleep pattern automatically badal jaayega aur aap ko raat ko neend bhi jaldi aa jayegi.  Alarm ke bajte hi uth khada ho jaaye, kabhi bhi 5-10 minute aur kar ke sote na rahiye. Har 15 dino ke baad alarm ka time aur jaldi uthen ke liye set kare to 7 baje se dheere dheere aap 5 baje tak pahunch jaayenge. 

Khule mein so jaaye

Garmiyon main logo ko aadat hai ki terrace par so jaate hai. Surya ki pehli kirane pragat hote hi aankhe khul jaati hai. To aap yeh prayog winter mein bhi try kare to khud jaldi uthne ki aadat ho jaayegi. 

Apne aap ko motivate kare

Benjamin Franklin ne kaha hai “Early to bed and early to rise makes a man healthy, wealthy and wise.” Agar aap wealth ko jyaada importance nahin dete hai to wisdom aur health ko hi wealth samajh le aur apne aap ko motivate kare. Doosre din ke liye time table set kar le ki jaldi uth ke aap ko kya karna hai. Important kaam shuruaat ke liye rakhiye. Early morning walk ya jogging ke liye jaane bhi health ke liye achcha hai to use ja chuke. 

Apne aap ko reward kare

Savere ke liye aise kam nirdharit kare jis ko karne mein aap ko umang hai aur jaise jaise aap jaldi uth paate hai to apne aap ko reward kare. Jaldi uthen mein health ko jo fayda hai vahi sabse bada benefit hai yeh aap nazar andaz na kare. 

Group join kare ya kisi friend ke saath appointment rakhe

Savere uthke aap walk par jaaye to garden mein koi group bana le aur roj niyamit milne ka vaada kare. Group na ho to koi ek friend ko saath rakhe aur us ko promise kare ki aap use nischit samay par milenge. To yeh ek motivation hoga ki aap jaldi uthe.  Ek aur baat: savere uth ke chai ya coffee peene ke liye jyada samay na bigade. Kai log coffee peete peete newspaper padhte hai to yeh negative hai. Activity mein lag jaaiye jaise ki coffee peene ke baad turant walk pe jaaye ya aur koi activity karne lag jaaye.  Agar koi friend saath na de to ek kutta paale jise roj uthke aap savere hi khaana denge. Kutta khud aap ko jagane aa jaayega. 

Neend Poora Le

Jaldi uthne ke liye jaldi so jaana bhi jaroori hai. Tabhi so jaaye jab aap ko neend aati hai. Agar aap thak gaye hai to sharir khud hi signal dega aur aap ise ignore mat kariye. 7 ghante se 8 ghante ki neend avashyak hai. Aadat jo ho jaaye jaldi uthne ki to aap jaldi se so bhi jaayenge. 

Lifestyle badlav

Jaldi sona hai to phir sham ka bhojan bhi jaldi hi le lena chahiye kyonki khaa ke turant so jaana sehat ke liye hanikarak hai. Shaam ke samay coffee ya chai ka sevan na kare aur ek healthy lifestyle apnaye to apne aap aap ko samaysar neend aa jaayega. TV na dekhe kyonki is ka light aap ko disturb karega. Aise hi mobile aur tablet par koi kaam na kare. Time pass karne ke liye koi kitab padhe. Light ko dim rakhe aur agar streetlight ki roshni aati hai kamre mein to parde laga le. Andhera khud ek signal hai aap ke body ko so jaane ke liye. Kudrat mein dekhiye sabhi pakshi andhera hote hi so jaate hai. 

Din mein sone ka taale

Din mein kabhi bhi sona nahin chahiye, chutti ke dino mein bhi. Aap ne aisa kiya to raat ko neend deri se aayegi. Agar thakan mehsoos ho to 5-10 minute ke liye khursi mein hi baithe apne aankh bandh kar ke rest kare. 

Ek hi din mein badlav nahi aata hai. 3 mahine ke liye koshish kare to aap ka jeevan badal jaayega. Jo jaldi uthte hai un ka kehna hai ki unka efficiency badh gaya hai aur voh jyaada kuch kar paate hai.

Loading...

Leave a Comment

Your Name

Comment

0 Comments

Loading...